ഇന്നു കേരളം ചേറളം

‘‘ആരുമേ ഭൂരിപക്ഷമല്ലാതെയായ് കേരളത്തിലും താമര പൂത്തിടാം!!!’’

‘‘നാരദാ, ചൊല്ക കേരളവാർത്തകൾ!’’

നാരദൻ തന്റെ മുന്നിലെത്തീടവെ

ചോദ്യമായിതാ മാവേലിയിങ്ങനെ:

‘’സദ്ഭരണമെന്നെങ്കിലുമെത്തുമോ?’’

 

നാരദൻ, ലോകസഞ്ചാരി, സ്‌നേഹിതൻ

കേരളത്തിലെ വാർത്തകൾ ചൊല്കയായ്:

‘‘വീണ്ടുമെത്തുന്നിലക്ഷൻ, വരുന്നയ-

ഞ്ചാണ്ടു കേരളമാർ ഭരിച്ചീടണം

എന്നു കണ്ടെത്തിടേണ്ടവരാണവർ!

ഇന്നു കേരളം ചേറളം, കാണ്മു ഞാൻ!!

ആരുമേ ഭൂരിപക്ഷമല്ലാതെയായ്

കേരളത്തിലും താമര പൂത്തിടാം!!!

 

ഈയിലക്ഷന്നിടംവലംകക്ഷികൾ 

മാത്രമല്ല ചിലർകൂടിയു,ണ്ടവർ

കേരളം ഭരിക്കേണ്ടതാരെന്നു ചൊ- 

ന്നാരു തോല്ക്കണമെന്നു കാണിച്ചിടും!

 

കേരളത്തിന്റെ സദ്പുത്രരായവർ

ദേശദേശാന്തരഖ്യാതി നേടിയോർ

കേരളം വികസിക്കേണ്ടതെങ്ങനെ-

യെന്നറിഞ്ഞറിയിപ്പവർ രണ്ടു പേർ

നാട്ടിലെത്തിയിട്ടുണ്ടു; പ്രവാചകർ

കല്ലെറിയപ്പടാറു; ണ്ടവർ സത്യ-

മാണു ചൊൽവതെന്നീ ജനം കണ്ടറി-

ഞ്ഞോട്ടു നല്കിയാൽ കേരളം സ്വർഗമായ്!

 

സത്യമാറ്റിൽ കുളിക്കാനിറങ്ങവെ

സത്യവസ്ത്രമെടുത്തോരസത്യമോ

നഗ്നനായ് ചരിക്കുന്നൊരീ സത്യമോ

സത്യമെന്നറിഞ്ഞീടണം കേരളം!

സത്യമെന്തെന്നറിഞ്ഞിടിൽ കേരളം

നിത്യമെത്തിടും ആനന്ദവീഥിയിൽ!’’